Ný skáldsaga:
Maríumessa
eftir Ragnar Arnalds

Heimasæta í Skagafirði, Þórdís í Sólheimum, verður fyrir dularfullri lífsreynslu sem dregur langan slóða á eftir sér. Mál hennar vefst inn í átök æðstu ráðamanna landsins og atvik sem virtust sakleysisleg í öndverðu ógna brátt lífi hennar.

Herluf Daa höfuðsmaður stendur fyrir málsókninni gegn henni. Yfirboðari hans, Kristján konungur fjórði, kemur einnig nokkuð við sögu. En frændur Þórdísar með voldugustu menn landsins í fararbroddi, þá Guðbrand Hólabiskup og Jón lögmann á Reynistað, standa þétt að baki henni.

Lífssaga þessarar ungu konu er afar forvitnileg og hún á sér enga hliðstæðu í Íslandssögunni. Jafnframt fæst merkileg innsýn í líf hins nafnkunna höfuðsmanns sem varð illa þokkaður hér á landi en ævi hans hafa ekki áður verið gerð skil í skáldsögu.

Hinn forni íslenski réttur sem landsmenn tóku í arf frá germönskum þjóðum og urðu einir um að varðveita var um sumt mannúðlegri og nær nútímalegum viðhorfum en Rómaréttur sem flæddi yfir flest ríki álfunnar á miðöldum. Skáldsaga Ragnars Arnalds um einstæða lífsreynslu og söguleg örlög Þórdísar í Sólheimum er byggð á sannsögulegum kjarna, en átökin um mál Þórdísar snerust ekki síst um það hvort leyfa mætti pyntingar sem löglega rannsóknaraðferð á Íslandi eins og tíðkaðist mjög á meginlandinu.